لماذا ياشباب القرية ؟؟؟

[سكاكر]

السلام عليكم ورحمة الله وبركاته

أخواني وأهالي قرية المالكية من فئةالشباب خاصة أود أن أطرح عليكم سؤال وأتمني الرد الصريح عليه منكم .

ليش أذا أتمشون سياراتكم في الديرة أتمشون على أقل من ال20 ليش ؟ هل هذي فهلوه ؟
وأذا حاول أحد يتجاوزكم أتصيرون مثل المجانين في السرعة بس على شان ما نسبقكم والله أحتكار للشارع ؟
وهل الشارع هذا شارعكم بروحكم صراحة ومن غير زعل هذي المشية بطالة ساعات الواحد عندة دوام ومتاخر وساعات عندة حاله طارئة وساعات ما أيلة الواحد مزاج أيمشي بسرعة بطيئة جدا .

وودي بعد أقول ترا الواحد ايمشي بطيئ على شاطئ البحر مو الشارع العام ؟ وبعد خبري الواحد أيخفف عند المرتفع مو ما باقي الا توقف السيارة ؟

بقول ليكم كلمة ياشباب لا أتخلون الواحد ياخذ عنكم فكرة أنكم ما عندكم أخلاق أو عديمين أحساس والسواقة ترا فن وذوق، وخل عندكم روح رياضية أذا أحد حاول يتجاوزكم .

أتمني أنكم أدافعون عن نفسكم وتبررون موقفكم .

[لولو كاتي]

في هذا الموضوع انا مع اختي سكاكر ليش هالحركات لان احنا رايحيين البحر شفنا شخص كان في نفس الطريقه يمشي وكأن ما يمشي وعلى المرتفع كأنه على اخر نفس الصراحة الحركات مو حلوة كلش .....

[malkawy]

الحمد لله انا مافيني هالطبع ..

هذا الطبع ما يمشي الا على المغازلجيـــــــــــــــــــــة ..

[سكاكر]

الحمد لله انا مافيني هالطبع ..

هذا الطبع ما يمشي الا على المغازلجيـــــــــــــــــــــة ..

صدقت ياخوي :thumbup1: :thumbup1:

بس وين اللي أيقول كلمة صراحه

[بن زيد]

بلا مغازلجية بلا خرابيط

بعد الواحد وسط الفريق كم تبونه يمشي 40 ولا 100

ولو على كيفنا خلينا في لفة مرتفع
كم جاهل اندعم في ديرتنا بسبب السرعة وغير الي الله استخارهم بسبب الحوادث
وكل واحد وراحته

و شوارعنا ما شاء الله عليها مستوية و تريح السيارة اكثر من الشار ع العام من كثر الحفر الي فيها

[المدلول]

بن زيد
وياك في كل كلمه قلتها
بس ابي اقول شي


على الشارع العام ..
جاهل بيعبر .. مرأه كبيره في السن بتعبر .. رجال كبير سن بيعبر ..
حاسبو الى هالشي ..!!!

بس مو تمشي على بيض خايف يتكسر

الاعتدال في المشيه ..!!!

والسلام ختام ...

[لولو كاتي]

يا خوك مدلول احنا ماقلنا لك تمشي 100ولا معناته انك تمشي 20احنا قنا الاعتدا ل في ا لسواقه احنا ما اعترضنا على السواقه بس احنا نقول اليي نشوفه لان هالمرة واحد ما كان يمشي مو على اساس ان يحاسب انت لو تشوف شلون اهوو يمشي اتقول هذا واححد بيموت النفس مخلص عنده ....

بعدين اطلب من الاعضاء يفهمون الموضوع قبل لا يردون ....

[دلع الموسوي]

لا تعليغ
يسلموووووو

[محمد أمير]

موضوع يستحق التفاعل فيه ..

بالمناسبة كلام اخوي بن زيد كفى ووفى ..

والصراحه اذا مشينا تقريبا 50 قالو مغرووور ..

قلنا في روحنا نمشي على الاقل 30 او 40 مو علشان نستهزء بالي ورانا ؟؟

علشان ما يصير حوادث في الطريق ..

والسلامه افضل من شوف حادث يخليكــ تندم عليه ..؟؟

وفي الوقايه السلامة ..

.....................................

اما اذا كان الشارع فاضي .. ذيك الحزه تقدرون تقولون ان هالادمي ما يسوى شي وهو يسوي هالحركــــــــات .. هذا جاهل ما يسويها ..

[المدينة المنورة]

بالفعل ، بعض الأحيان الشارع فاضي ومكشوف ،وإللي قدامك يمشي السيارة وهو مسترخي على الآآآآآآآآآآآآآآآآخر ، كأنه قاعد على كرسي على شاطئ البحر ،مش على مقعد سيارة، وإلا تقول رجوله تعوره !!!
الإعتدال زين يا شباب
والكلام ليس موجهه لكل الشباب وإنما إللي يمشي هالمشية بس.

تحياتي
أم السادة

[bat man]

الضاهر ما عندش سالفه
وشارع اصلاان كل فيه مرتفعات
عجل روح انقتل ارواح الناس
استخدمي طائرة احسن ليش

[النعيمــي]

انا اقول السرعه من الندامه

[السهم الملتهب]

السلام عليكم ..

"" لولو كاتي ""
بما أن جبتي طاري طريق البحر ، أعتقد لو طفتي عليه بتشوفين الانارة ضعيفة أن لم تكن معدومــه ، وعلاوة على ذلك الشارع الغير "مسفلت " بطريقة سليمة أو الاحـرى وجود الحفر ، يعني اقل شي بيمشي 40 أو 45، كيلو متر ..


أضيف على ذلك هناك بعض الناس يتجاوزون الناس الاخرون فقط لابراز مدى قوته في التجاوز وطريقة السيارة في التجاوز .. ليس لأنه متعطل او حدث له امر ضروري حتم عليه التجاوز ..

تحياتي ..

[لولو كاتي]

اخي السهم اللتهب مثل ما قلت بيمشي 40او 45 مو المشيه 20وبعدين احب افيدك انه اليي شفته كان العصر يعني الاضاءة مالها داعي اعتقد ان الشمس تكفي وتوفي علشان اتشوفون الشارع وبعدين مو عذر ان الشارع مو (مسلفت) لان هذا مو عذر بس اليي يبي يفوشر يعرف شلون احب اوضح ان الكلام للناس الي تسوي هالشي لان احنا مانعم الكل وما في داعي التجريح في بعض لان مجرد رأي لا غير .....


مسامحة اذا غلط على أحد ..

[عاشقة الصمت]

السلام عليكم..


اني في رايي ابطىء ويكفينا الشر


احسن من السرعة والشوارع ماشاء الله


ماقصروا مخلنها احسن مايكوون يعني السرعه كلش غلط فيها


يعني كل واحد ونيته يمكن ابطىء حذر

ويمكن مثل ماقلتين بس اذا مايضر احد محد ليه حق يتكلم

تحياتي

[5حيزبون5]

والله موضوع جميل


وحيزبون يقول هذي مزاج واللي يمشي جذي هذا يستعرض

واذا احد تجاوزة يزعل ليش مدري

وكم مرة يصير هاي الشي امام عيني في الشارع عند البيت

وناس متاخرة وناس موفاضية الى هاي الشي وهذا يمشي وكانه أسد في الغابة

نبي مشية عدله مو مشية انت تقرر سير اللي وراك لا

انت لازم تمشي بالقانون داخل الديرة او خارجها

سؤال الى اللي يمشون هاي المشية


(( لو انت متاخر او عندك حاله طارئة في يوم من الايام تقبل احد يمشي امامك جذي )) ؟


بس في الاول والخير هذي مشية أستعراض ودلاعه

[لولو كاتي]

كلام سليم اخ حيزبون لكن من اليي يقول الواقع المشكله انهم يفهمون الموضوع غلط وهاي مشكله كبيرة ....

[الشروق]

الصراحة نحن نعانيا من نقطةخطيرة وهي السرعة القاتلة وخاصة في فريجنا ولاتوجد مرتفعات وكأن

الشباب داخلين حلبة سباق الفورملا والأطفال تتفالت من بين الدواعيس من غير تامل وغير وعي

للسيارات الجاية بسرعة ، وبما انكم فتحتون الموضوع انا اناشد من خلا ل هذا الموضوع الجهات


المختصة في النظر الى مدى حاجتنا لوجود مرتفعات في الفريج الجاي من يمين دكان نزار .

واقول في الاخير الاعتدال في السير يحفظ سلامتنا وسلامة الجميع .

تحياتي
الشروق

[SHAW NASS]

الصراحة ما عندش سالفه اذامو عاجبنش المشيه وطقي راسج في الطوف
مسامحة اذا غلط على أحد

[لولو كاتي]

تغلط وتقول مسامحه والله حاله هههههه احنا وضحنا من البدايه انه مجرد رأيي وماله داعي التجريح
على العموم الله يسامحك ....

[بحراني اصييل]

بسم الله الرحمن الرحيم

اللهم صل على محمد وآل محمد وعجل فرجهم يا كريم

شكرا على طرح الموضوع المهم

أرجو من أحبتي أهالي المالكية المعروفين بالطيبة

التفاعل لحل هذه المشكلة

ومشكلة بعض المشاة في شارع المالكية العام

حيث يمشون ببطئ دون إحساس بأن بعض السائقين لديهم حالة طوارئ

مما يسبب للمارة على طريق المالكية توتر الأعصاب وارتفاع الضط ..

واذكر لكم هذه القصة التي حدثة مع ابن عمي

فقد كان مع اسرته بقريتكم فأصيبت ابنته

في يدها فأسرع للذهاب بها للمستشفى وما إن وصل الى الشارع العام

وإذا بــ (( هذا واقف بسيارته ويسولف وسط الشارع وهذا يتمشى على راحته بدون احساس

واللي يمشي على راحته بسيارته بالفلسفة ))

حتى انه ظل ضاغطا عل (هرن السيارة )مدة طويلة ولكن لا حياة لمن تنادي

فبدل من ان يبتعدوا بدأوا بالمشاداة الكلامية "ليش انه خرب عليهم سالفتهم

فقال لهم شوفو البنت وش فيها ايدها بتروح عليها وانتون ولا عندكم احساس

فنزلو روسهم ( من الفشيلة )

وما وصل مستشفى الطوارء إلا بعد فوات الأوان

الحمد لله ركبوا قطعة إصبعها ولكن إلى يومكم هذا ما تشعر ابها

وكل هالشي بسبب تأخر وصولها للطوارئ


حبايبنا أهالي المالكية على العين والراس

ولكن لا بد ان نتذكر قول أحد الأئمة (عليهم السلام )

( رحم الله من أهدى إلي عيوبي )

نسألكم الدعاء

[لولو كاتي]

مشكور اخويي بس وين الي يقول الحق كل يضنون ان احنا نظلمهم ...

[محمد نور]

انا امشي عشرين داخل الديره لان الشوار ماتسمح للواحد امشي ازيد واليهال واجد وتخاف تدعم لك واحد بس ما اخلي الواحد مايجاوزني انا من عشاق السرعه لاكن اخاف على خلق الله لاني في منطقه سكنيه

[بنت عالي]

ايش فيكم الموضوع كله صح شباب الديره حركاتهم بطاله طبعا مش الكل الاغلب .
رايي وحره .

[**قاهرتهم**]

اني اقول السرعة من اندامة واني امشي في اديرة 40 واذا عصبو علي تجاهلتهم والله الشارع في ناس واني ماامشي سرعة تخالف القانون مشكورة على الموضوع الحلووووووو

[sweet fati]

في المالجية مايقدر احد يسرعة صج لان مال المالجية يفلتون روحهم على السيارات خصوصا في الشارع العام كل مرة اروح اشوف احد يفلت روحة على الشارع مادري ليش واليهال بعد كلى يركضون ؟؟ بس اقل من 20 فيها السالفة غلظ اكيد فيهم شي الي يسوقون وماظن انهم عن الحوادث

[زينب المصير]

صح المفروض اكون هناك اعتدال في السياقه لا سرعه ولكأن السيارة ما بتمشي
حاسبوا للي وراكم اسوق
الشارع مو اليكم بروحكم

[عـــاشـــق -10]

لأن الشارع صغير