سفينة النجاة.. الحلقه الاولى

[ولد الاكابر]

توضيح
1: الشخصيات الموجوده في المسلسل مع الحوار ليس له صله بالواقع وكل شي من نسج الخيال بالرغم من توافق الشي مع الواقع

2: نعتذر الى الاعضاء من استخدامنا الى اسماءهم المستعاره دون موافقكتهم على ذلك ..ونكرر اعتذارنا
3: ونشكركم على المتابعه وصدرنا واسع الى الانتقاد البناء

مع تحيات القائمين على هذا العمل
--------------------------------------------------
-------------------------------------------------
المشهد الاول


بو عباس بتفقد جدار بيته


بوعباس: ياربي..... ويش هالناس اللى ما ترحم .. توني صابغ الجدار من يومين.جاك هالمتفرغ وخربط عليه..واذا قلت حق اولياء امورهم قالوا اولادنا ما سووون جذي.. يا صبر ايوب على بلواه

بو محمد : ها بوعباس ويش فيك اتهز راسك؟؟؟

بو عباس: (يحاور نفسه) ويش افكنا من هذا المخرخش... ما اسوي شي بس قاعد اطالع ويش مكتوب على جدار بيتي

بو محمد: مو عاجبنك هالتصرف؟؟؟؟؟؟؟ نسيت ايام اول؟؟؟

بو عباس: ارجوك خل عنك هالسوالف ..لا تقعد اتعور راسي

بو محمد: من حال الى حال ..والله

بو عباس : لا تنبش في الماضي لو سمحت؟؟ لا تسوي لينا سوالف .. انا اعرفك زين ..ايقول المثل : احذر عدوك مره واحذر صديقك الف مره

بو محمد: قول اللى بتقوله ..بيجي يوم عليك بتكون مثلي.. الزمن سوانا جذي

بو عباس : الله لا يقوله .. الضمير والانسانيه ما تسمح

بو محمد : ويش كاتبين على جدارك... (انا لو مت بتحب غيري) .. هذا الا واحد مراهق ..لا تكبر السالفه ..يا كثرهم المراهقين في الديره

بو عباس: (يحاور نفسه) انت اول واحد منهم

بو محمد : ويش اتقول؟؟.. تكلمني؟؟

بو عباس : لا ..بس قاعد اقول الخط حلو .. خط كوفي بعد ...كشخه يعني

بو محمد : ويش تبغي من الشباب ما ل هالايام الحب امعذبنهم .. المراهقين عافسين الديره .. شوف اللى صار في شارع المعارض ليلة راس السنه

بو عباس : من اللى سوا هالشي ؟؟

بو محمد : المراهقين ..من غيرهم بعد

بو عباس : يعني مو ربعنا مثل ما يقولون

بو محمد : يمكن بعد ؟؟ انتون الا طوفه هبيطه

بو عباس: يمكن اسألك سؤال..

بو محمد : قول خلف جبدي ..انا حاضر اجاوب على كل سؤال

بو عباس : تدري ما يحتاج .. روح اتغذى احسن ليك

بو محمد : انت الظاهر اتفكر في الجدار واجد

غريب الدار: ابويي حطينا الغذاء .. ابسرعه تعال... جواعا

بو عباس: انزين جاي
========================
المشهد الثاني

على طاولة الغذاء


ام عباس: حيالله بو عباس

بو عباس: حياش الله .. عجل وينه نبويه ليش مي مو جوده؟؟

غريب الدار : انتون شوفوا ليكم صرفه ويا هالبنيه ..واجد امدلعينه وامخلينها على كيفها ماصارت ..خيرتها بتخترب عليكم..شوفوا الساعه جم الحين؟؟؟؟

بو عباس: انت ويش فيك على اختك .. حاط دوبك ودوب هالمسكينه

غريب الدار: انا ويش قايل ؟؟ بس انتون واجد امدلعينها .. وهي لاعبا عليكم صراحة.

بو عباس: يا ولدي احترمنا عاد .. لا تتكلم بهالاسلوب ..انت ابكلامك هذا اتقول احنا ما عرفنا اربيها..افاااا عليك يا ولدي

غريب الدار: اسف ..انا مو قصدي جذي ..بس اقول هالزمن ماله امان.. وتدرون عن مغريات الشارع

ام عباس: يعني شنهو مغريات الشارع.... خوفتني على ابنيتي

غريب الدار: هالايام يا يمه زايده اللعبه في الديره .. شباب ضايع ما عنده شغله غير البوق والنهب ومطاردة خلق الله ..شباب ماله هدف ولا دين

بو عباس: وانت الصاج يا ولدي .. توني اسولف ويا ابو محمد عن سالفة شارع ليلة راس السنه في شارع المعارض ..شباب جذي..اتقولين يا ام عباس راكبنهم ابليس .. شباب لا عندهم ذمه ولا ضميراضربوا الاغراب واعتدوا على الاعراض ..كسروا المباني وحرقوا حلال الناس ..يا جماعه الديره والله جايه على خراب

غريب الدار: ابويي هذا شارع المعارض وشارع العدليه اتشوف فيهم البلاوي ليلة الجمعه شباب بس اداور ابهالسياره وملاحق البنات والكاس في الايادي واللى ايبط جبدي اكثر كشختهم اموصلا حدها اتقولون رايحين عرس..كشخه ومخ ما فيه ..ويش فايده

بو عباس: انا اقول روح مجمع السيف وشوف اللى ايصير.. وخاصة هالبنات ..يا ربي كما خلقتني .. انا ما ادري اشلون اهاليهم اخلونهم اطلعون جذي .. وصدق الشاعر احمد شوقي : الام مدرسة اذا اعددتها اعددت شعب طيب الاعراق

نبويه: اني وصلت ..افا ليش ما نطرتوني على الغذاء؟!!!!

ام عباس: انتين ليش متأخره .. من وين جايه؟؟؟

نبويه: اني قلت الحين ..راحت عليش يا نبويه من تنظيم القاعده ماليش الا تستخدمين حق الفيتو في الدفاع عن نفسش

غريب الدار: لا تتهربين من السؤا ل...ابسرعه جاوبي

نبويه: ويش فيه ذي ..شاط على عمره ..لا يكون امصدق روحه عدل

بو عباس : نبويه ..احترمي اخوش لا تقولين عنه جذي

نبويه: ويش رايكم نتغذى وبعدين اقول لكم السالفه ..اني جوعانه حدي

بو عباس : يالله سموا بسم الله الرحمن الرحيم ... ام عباس امسوي ليكم هوامير حدر العيش اليوم ..تسلم ايدها ام عباس

ام عباس : (ابتسامه شاقه الوج) من خيرك يا بوعباس

نبويه : اماه اليوم غسلي المواعين..اني بروح اراجع..ما فيي شده

ام عباس: امرنا الى الله

غريب الدار : دلع عيني دلع .. دلع والله دلع

نبويه: سكتوه لو اقوم من الغذاء الحين

بو عباس: بس... صلوا على محمد وال محمد

=======================

المشهد الثالث


ام عباس: تعالي نبويه: قولي لينا سالفة التـاخير.. الظاهر اخوش صدق يوم قال عنش امدلعينش احنا واجد.. وانتين قاعده تستغلين طيبتنا وياش

نبويه: حرام عليكم ..ضلمتوني .انتون مو واثقين فيني

غريب الدار: انزين قولي ليش اتماطلين

نبويه: اني وصلت صديقتي طحالب الى بيتهم..

غريب الدار : وهذي صديقتش امضيعه ما ادلي بيتهم؟؟

نبويه : خلني اكمل وبعدين علق .. انزين ..اني وصلتها بيتهم لان صديقتي طحالب كانت خايفه

ام عباس: خايفه من ويش..ويش صاير

نبويه : امس لما نزلنا من الباص صديقتي طحالب راحت تتمشى بيتهم وقام احد الشباب الصايع ايلاحقها ويسمعها كلام حلو... من جذي خافت اليوم يتكرر المشهد وقالت لي تعالى وصليني البيت وبعدين روحي اني واجد خايفه .ومن جذي اني اتاخرت عليكم

غريب الدار : وانتين ما خفتين على روحش .. انتين تفكرين روحش شنهو

بو عباس: ما قصرتين يا بتي .. كنتين عند حسن الظن.. وانت يا غريب الدار بسألك سوال ..

غريب الدار: تفضل .. ابا عباس . انا رهن اشارتك

بو عباس : انت اعتقد عضو في جواله الديره مو جذي

غريب الدار: ايه من زمان .ويش فيها الجواله؟؟

بو عباس: انتون يا الجواله ليش خدماتكم خارج الديره ليش ما انشوف ليك نشاطات داخل الديره

غريب الدار: من قايل لك هذا الكلام.. الجواله ليها سمعه داخل وخارج الخليج العربي.. اشلون مالينا نشاطات داخل القريه ..غلطان يا بوعباس

بو عباس: انا ما اقلل من مكانة الجواله ..بالعكس افتخر بهولاء الفتيان الذي يجسدون كل وقتهم في خدمة هذه الارض الطيبه

غريب الدار: .يمكن اتوضح لي شنهو تقصد في كلامك مالنا نشاطات

بو عباس: انت انتبهت الى كلام اختك..

غريب الدار : ايه انتبهت ..السالفه سالفة مراهقه وطيش لا غير

بو عباس: حلو ..هولا ء المراهقين ليش ماعندكم برنامج اليهم

غريب الدار: ضحكتني يا بوعباس..وين راح تفكيرك؟؟

بو عباس: انت فكر في اللى انا قاعد اقوله .. واذا سؤالي صعب حوله الى الجهات العليا

غريب الدار: بما اني مو فاهم ويش تقصد بس سؤالك رايح بوصله الى المسئولين

ام عباس: مسكينه طحالب عورت افادي .. يا بتي اتحملي ابروحش

نبويه : اتصدقين اماه اتقول صديقتي طحالب ان اللى قام ايطاردها واحد لابس ليه اثياب اتفشل ..حاط على صدره سلسله وصدره نصه طالع يعني لو لبنيه بغت اتفكر فيه مستحيل اكون..خلتني اضحك

غريب الدار: ايه هذا من الشباب اللى اقعدون عند الشارع ينتظرون باص المدرسه ..اضحكون والله وخاصة اذا يلبسون نظارات والراس كشه

ضحك الجميع على ما قاله غريب الدار

في هذه اللحظه يرن النقال الخاص ب غريب الدار


غريب الدار: الوو

ريلاكس المهاجر: ها وينك غريب الدار .. الساعه جم امر عليك ..اليوم مباراه الاخضر

غريب الدار: اليوم المباراه ؟؟ بس باجر علي امتحان

ريلاكس المهاجر: كلها ساعه ونص .. والاخضر في كل دقيقه محتاج الينا

غريب الدار.: البركه في فاصل اعلاني ما بيقصر.. بس انا علي امتحان باجر ما اعتقد اجي

ريلاكس المهاجر: لا تقعد تتعزز ..شوف حبيبي اذا ما جيت اليوم خلاص علاقتي وياك انتهت

غريب الدار: امرنا الى الله ..كل شي ولا ريلاكس حبيب الكل

ريلاكس المهاجر: اليوم فاصل اعلاني امسوي شيلات جميله ..انت عليك بس شجع واستمع الى جماهير الاخضر

غريب الدار : خلني ساكت ..جماهيرنا صراحة مصخوها .. طلعوا عن حدود الادب

ريلاكس المهاجر: وان الصادق هل المشكله لازم انسوي ليها حل؟ يالله اشوفك الساعه اربع

غريب الدار: اوكيه باي حبيبي

بو عباس: من متصل ليك هالحزه؟؟

غريب الدار: هذا ريلاكس المهاجر .. بمر عليي انروح مباراة الاخضر

بو عباس: يا ولدي باجر عليك امتحان ..اشلون اتروح المباراه .. ..يا ولدي لا اطير مع الطايرين.. انا اسمع سوالف عن جماهيركم ان بعضهم اذا انغلب الفريق ما يروحون المدرسه ..فكر في المستقبل ,,والكوره لاحق عليها..يالله اعتذر من صديقك وقول له مااقدر اروح

غريب الدار: بس انا وعدته اني اروح وياه..اشلون اخلف الوعد

بوعباس: ونعم التربيه يو ولدي.. مسموح ليك هالمره ..بس بتكون اخر مره

غريب الدار: ابي وما ادراك ماابي .. راعيها

بو عباس: على ذكر راعيها.. ويش اخبار موراعيها مو رايح وياكم بعد.. هذا الصبي احذر منه يا ولدي واجد .. لانه شلاخ درجه اولى ما ينقدر عليه ..لايقص عليك بسوالفه

غريب الدار: ضحكتني يا ابتي.. خلاص موراعيها اعلن التوبه .. صادوووووووه... يالله اشوفكم بعد المباراه..اوه انسيت بعد المراجعه.. وصل ريلاكس المهاجر الظاهر

بو عباس : اشلون صادوه

غريب الدار : السالفه اقولها ليك بعدين .. باي الجماعه بنطروني برا ..اوكيه باي

بعد لحظات
نبويه: (تصرخ) الحقوني.. الحقوني

تابعونا في الحلقه القادمه

مع تحيات ... ولد الاكابر

[angel]

حلوه مره المشاهد اخوي



بس عندي ملاحظه الاب :ابوعباس
ولابن : غريب الدار


باي

[ملكاوية]

تعالوا صدق اذا الابو بو عباس والام ام عباس


عجل وين عباااس؟؟

مسافر للدراسة؟؟؟؟؟

[أبو سراج]

بصراحه مجهود رائع جداً

نتمنى المزيد وياليت نتواصل على هذا المنوال ونحقق غايتنا

عزيزي ولد الأكابر

عندي اقتراح بسيط ترى ملكاوية ممثلة بارعه ياليت تدرجها في المسلسل

صدقني ما راح تندم

تحياتي النورانية
ســ أبو ــراج

[غريب الدار]

جميل جدا ،،
بس بيني و بينك انا ما احب شي اسمه كرة ،،
بس حلو الموقف ،،

على فكرة يا اخ ولد الاكابر ،، ما حددت وقت المسلسل ، هل هو اسبوعي ام يومي ام ماذا ؟؟

نبوية لا تتاخرين هالمرة ، ايه سمعي كلام اخوش العود ..

المغترب

[ولائي لبني هاشم]

شكرا أخي ولد الاكابر .. لكن وين اسمي ولا للحين ما صار دوري ؟؟؟

[المنهل]

طق طق طق طق طق طق


يالله انحني للجمهور
على هالصفقة

ممتاز جدا

نتمنى نشاهد باقي التغطية للظواهر الاجتماعية في الحلقة القادمة

و الصفقة العودة في الاخير


بس يا ريت تنتبهون لتعليقات الاعضاء
فأين عباس
لا بد ان يكون له دور و لا بتفقد المسرحية بعض البريق

و بعد لاحظت الحوار بين غريب الدار و أبو عباس مو حوار بين أب و أبنه
و بجذي هدمت جدار الواقعية في المسرحية
يمكن تقول هذا الحوار المطلوب بين الابن و الاب الحوار الحضاري...و يتحاورون كانهم اخوة لكن خرج الحوار فوق الحوار الاخوي ايضا

هذي بعض ملاحظاتي المتواضعة

و أشد على ايديكم اخواني و انجاز حقا رائع

[نورس]

مشكورين المشاهد جدا رائعه تناقش الواقع الملموس


بس عاد احنا ما الينا دور



اختكم نورس

[همسة قمر]

جميل جدا .. ما خطته يداك .. أخي العزيز ولد الأكابر ..

مجهود رائع تشكر عليه .. :)

ووفقكم الله ..

بانتظار التكملة :)

و أرجو ان يتم تثبيت الموضوع ..

[بوعباس]

السلام عليكم ورحمة الله وبركاته ..

وصل الاب بوعباس .. :D

اقدم شكري وخالص امتناني لك يا ولد الاكابر ..
ليس فقط على انضمام لمسرحيتك الجميله والتي تشرفني ان اكون من اضلاعها ..
انما اشكرك ايضاء على تجسيدك لمواقف الحياة ومشكلاتها ,,
وما يحدث منها وما فيها .. وما عليها من امور تحدث في واقعنا الحالي ..

فقد اعجبني اسلوبك الجميل ..
وعجبني دور الاب ..
فاتمنى من الجميع ان يكون حريصين على متابعتهم لهذه المسرحيه ..

ويمكن الاستفاده من المسرحيه لتطبيقها واقعيا على خشبة المسرح ..
واضافة عليها بعض التعديلات مثلا " ان تكون كوميديه بعض الشيئ ..

ولكم مني اجمل تحيه ..
ابوكم :D بوعباس

[طحالب]

اشكرك يا ولد الاكابر على هذا المسلسل الكوميدي الحلو
المفيد والنافع الذي يجسد نمط الحياه في مجتمعنا.

واشكرك في انك خليتني من ضمن الممثلين. بس المره الثانيه ابي دور بطوله.



شكرا

طحالب طحلوووووووووب

[عذراء]

مشكووووووووووووووووووووووور
أخوي ولد الاكابر على المشهد
الحلوووو
مرة
الله يعطيك العافية
يسلموووووووووووووووووووووو
جزاك الله خير
ما تقصر
تحياتي
العذرااء

[القلم الحزين]

اشكرك يا ولد الاكابر على هذا المسلسل الكوميدي الحلو
المفيد والنافع الذي يجسد نمط الحياه في مجتمعنا.

[كلي حزن]

عجيب لااااااااااااااااااااااااااااااااااااااااااااه
يلا كمل الباقي

[نور الحسين]

مشكور اخي ولد الاكابر

على هذا المسلسل الشيق


في انتضار الحلقه الثانيه

تحياتي
نور الحسين

[8:27pm]

في تمام الساعه04:45pm

قصة رائعه وواقعيه لكن اين البقيه (الحلقه القادمه)

ربما الموضوع قديم على مانضن؟


لكم فائق احتراماتنا...


اصدر الساعه04:47pm

[لاعب فريق المرح]

السلام عليكم..

جك جك جك لاااااااااااااااااااااااااااااه تستاهل أخي الكريم..

راح أقول لكم قصة قصيرة بخصوص النقطة الاولى:

في أحد الايام وفي وقت الظهيرة كنت امشي مع أحد زملائي
بعد مانزلنا من باص المدرسة وأحنا نمشي شاهدنا إمرأة وبيدها
عصى وبجانبها ابنتها وهي في المرحلة الثانوية وكانت تبقي بصوت
عال جدا ولم يكن عليها لا دفه ولابالطو..والسبب هو ان أحدالشباب
من اللي طايحين حظ متحرش بها.. طبعا كان الموقف والمشهد مره
مؤلم ااااااااااااااااااااااااااااااااه وااااااااالله مره مؤلم..

واما بخصوص النقطة الاخيرة التي تتكلم عن الجمهور..

للاسف الشديد جماهيرنا الى الان مش جايه تثقف رياضيا
ألفاظ بديئه ومش محببه تطلقها فئة صغيره من جماهيرنا
ضد الخصوم والحكام هذا بجانب بتسمية نادي التضامن
بالعدو وباليهود اااااااااااااااااااه اشلون تقولون عنهم
يهود وهم مسلمين ..

يعطيك العافية

صاحب الموضوع.. أحنا في لإنتظار الحلقة الثانية..

موفقين.. ان شاءالله

البنفسج