ذكريات مدرسية

[أبو سراج]

كل منا عاش ايام مدرسية وذكريات لا أعتقد أنها ستنسى ، وبعضنا لازال يتذكر هذه الذكريات

ومنه فحبذا لو اتحفنا الأعضاء الكرام بما يتذكرونه من خلال أيامهم الدراسية الماضية والحالية من ذكريات مروا بها خلال أيام دراستهم ومواقف جميلة عاشوها كي يستفيذ منها إذا كانت ذات صبغة إيجابية ، ويتعض منها من الآخرون إذا كانت ذات صبغة سلبية
كي تعم الفائدة والمتعة بين الجميع

فلا تبخلوا علينا بذلك
كي نعيش ايام الذكريات الجميلة التي نسطرها للأجيال القادمة

أخوكم

[الحوراء]

شكر اخي ابو سراج

اتذكر يوم كنت في المرحلة الابتدائية , وعندما اتى يوم تكريم المتفوقات
وقامت المديرة بتوزيع الجوائز للطالبات المتفوقات وكنت انا من المتفوقين ولما وصلت المديرة الى اسمي وقفت حائرة لا ادري ماالذي يريدون مني لأنني كنت من الطالبات المشاغبات ورفضت الذهاب لاستلام الجائزة خوفا من مدرسة الرياضة المصرية التي دائما تضربني!!!!!!! وخسرت الهدية :( :(

اختكم الحوراء

[ولائي لبني هاشم]

عورت قلبي أختي حور :(

انزين ذكرتيني بموقف كان مشابه تقريبا .. يوم كنت في المرحلة الابتدائية كانت مدرسة الدين ماخذتني قي فقرة في حفلة مدرسية والفقرة كانت عبارة عن نشيدة وكان لازم نلبس فيها مخنق وانا حضرتي ما دورت لي من قبل ولما جت حزت الفقرة قعدت ادور والبنات نشدوا القصيدة وانا ما رحت معاهم لكن اثر في نفسيتي وبالخوص ان المدرسة كانت تعزني والحين كلما أذكر تجيني الصيحة كأني أعيش الموقف مو كأن صاير من زمان لكن يالله خيرها في غيرها لان بعد هذي الفقرة ما قصرنا وكانت لي الكثير من المشاركات المدرسية .:D

[*فاصل اعلاني*]

صادني موقف يوم كنت على ايام الثانويه وكان اول يوم اداوم فيه في الثانوي

تعرفون الجو يتغير شوي اذا كان اول يوم دراسه ... الموقف صادني صوب الماي مال الشرب وكان المكان مسقف ... رحت اشرب ماي وما كنت اعرف احد في داك اليوم والطلاب واجد واقفين ... بعد ما خلصت قمت اتمشى وانا مفهي ... الا ............... وشوي ....

دعمت عمود الحديد اللي يسقفون فيه المكان اللي فيه الماي .... لو سمعتون ديك الرنه اللي طلع منها الصوت جان تقعدون تضحكون ... سويت روحي ان ما صار شي والضربه تعورني .....

ومشيت والطلاب يطالعوني ووجهي صار نفس الطماطيه .....

[الحوراء]

اخي فاصل اعلاني :

ههههههههههه الله يساعدك من ها لفشيلة لكن اشوة عدت على خير

اختي ولائي لبني هاشم
البنات لازم اتصير ليهم مثل هالمقالب الحلوة

على فكرة انا حوراء مش حـــور

اتحياتي
الحوراء

[أبو سراج]

بصراحه يوم كنت في الصف الخامس الإبتدائي وكنا إحنا الطلاب الشطار نخاف من فيتنا لما تصيدنا مشكله ، على العموم ما بطول معاكم ، وكنا نروح المدرسة أول ناس وننطر حجي علي مال داركليب يفتح لينا باب المدرسة ، وبينما هوه يفتح كان الطلاب يتزاحمون علشان يحصلون على المرجحانات اللي في المدرسة.

خبركم انا مالي ابهالسوالف وكل مره كنت انتظرهم يخلصون زحمتهم وندخل بهدوء.

مره من المرات قلت بدخل معاهم من وقت وبحجز لي مرجحانة ولكن كان واحد واقف قدامي ومضايقني حدي.
انا بصراحه انقرهت عليه قمت ودفعته بيدي ولكن مع الأسف ما كنت أدري انه قريب من البوابه الحديدية وصاد راسه الباب الحديدي وفتح ليه فتحه عند الحاجب ودمه سال وهو المكسين ما يدري من اللي دزه ، عاد أنا خفت وتباعدت عن المكان وصارت القضيه ضد مجهول ، وانا تحوس في جبدي وما قادر ، بعد ما إلتأم جرح الولد قلت الحين لازم أقول ليه ، عاد رحت ليه وهو مفرفش وقلت ليه عندي ليك سالفه ، تذكر اللي صار لك جنب البوابه ؟ قال إيه . قلت ليه انا بصراحه اللي دفعتك وما كان قصدي ، قال الحمد لله الله ستر ومسامحنك .

لكن بصراحه موقف يخوف كان والدم يسيل من صوب عينه

لحد يسوي مثلي

[بنت السادة]

ما في اقوى من الكف اللي حصلته من مدرسة الرياضيات في ثالث ابتدائي ..

كانت المعلمة عاطتنا واجب في الكتاب .. وحضرتي خليت اخويي يجاوب عني ... والمصيبة الجواب خطأ رحت تصحح ليي الا الكف على الوج :( :( :(

ومن الفشيلة ولا دمعة طاحت ... بس الله لايراويكم الوج صار طماطه خايسة :D :( :(

[ملكاوية]

الله يسلمكم ......................... في يوم من ايام الثالث اعدادي عطونا درس علوم فيه عن الفرن اللافح....خب يعني المدرسة تجي وتشرح وتخلص واحنا مو عارفين شي ...... المهم ..... الحين هي خلصت الدرس ..... يوم ثاني راحت جابت لينا المديرة عن يازعم هي شارحة لينا وبنجاوب ...... انزين اني كنت قاعدة اخر وحدة علشان السوالف .......... بعدين قامت المعلمة تسالنا اساله اول مرة نسمعها [ لاننا نايمين في حصتها ] ...... ما اشوفها الا تقول انتي يا .....
شنو عكس الفرن اللافح؟؟؟؟؟
بسرعة جاوبتها وقلت ليها غير لافح .............. جان البنات يموتون من الضحك ... والمديرة مو فاهمة شي [ على بالها الجواب صح ] ...... بعدين قالت لي المدرسة استريحي .... لكن عقب ما خلصت الحصة قامت زفتني زف ......... لكن قلت ليها الغلط منش انتين انش ما عطيتينا الاسئلة قبل؟؟؟؟؟
فما اشوفها الا دازتني بقوة على الجدار..... واني وأحد دزني..... سويت روحي بموووت .وقمت اصيح واهددها اني بقول للوالد كل شي وبتشوف جان ما فصلها .....
يوم ثاني راح ليها الوالد وعطاها كم كلمة.... وادبها ..... لكنها ما تابت جت تقول ليي ان مدام عندي هالابو اللي مدلعني ماراح افلح.... واني كالمعتاد رحت وقلت للوالد مع بعض الزيادات ..... فراح ليها وقال ليها انها اذا تقربت مني مرة ثانية فهو بنفسه اللي براويها شغلها ........................... وحتى انه يقدر يوصل الامر للوزارة ( كان يهددها على اخرطي ومن داك اليوم حطت ويايي العداوة .... لكن في اخر يوم في المدرسة قمت رحت وحطيت مسمار في خشبة كنت مبرزتنها من البيت تحت تاير سيارتها ........ وبس مشت جان يهفت .... واني رحت طفت عليها وقلت ليها ........ اوه مسكينة معلمة تايرش انبط .... وقمت اضحك...
لكني رسبت في مادتها رسوب عدل:D

[يتيمة حبٍ]

موقف يفشل ........

في يوم من الايام وانا في الصف الثالث كنت جايه المدرسة دخلت المدرسة عاد وكنت امشي في الممر وأنا كنت مفهيه عاد جان ادعم في الحديدة اللي قدامي وهناك بعض البنات بـــــــــــــل جان اتفشل عدل................ ولكن في الحصة الثالثة ما حسيت الا بألم فظيع في الرأس عدل ماني قادره جان تقول لي صديقتي شنو فيش قلت ليها راسي اعورني لاني عند جيتي المدرسة دعمت في الحديدة جان تقوم وتقلبهاضحك دعل وانا يحضي متفشله وكأني طماطيه ...........هههههههه

موقف يفشل في الاذاعة الصباحية ..............
كنت في يوم من الايام مع زميلاتي الثلاث امسويين كلمة ونشيدة وقراءة قرانية في الاذاعة وكنت اني سألقي النشيدة الحين الحين خلصوا البنات بقيت اني وكانت النشيدة اسمها شهر البركة عن رمضان وهناك كانت مساعدة المديرة قدامي واقفة من شدة الخوف الله يسلمكم من بدال اقول شهر البركة قلت شهر البكرة جان الصفوف تضحك عدل بـــــــل واتصير الفشيلة اهني حتى انا قمت اضحك على روحي وهناك مساعدة المديرة قامت تضحك عدل وصرت طماطية حمراء من شدت الفشيلة ........ههههههه

اختكم الصغرى زهرة الربيع

[funny heart18]

صراحه الدراسه ممله ... بس الذكريات كانت تحليها


بصراحه لما كنت في الابتدائي والاعدادئي يازعم كنت مادبه


بس رحنا الثانوي طلعت البلاوي


من المواقف اللي صادتنا

في اخر الايام الدراسيه كانوا ما يدرسونا او بس يعطونا مراجعه، فكنا الحصص اللي تعجبنا نحضرها واللي ما تعجبنا نشرد منها
صادنا يوم حضرنا بس اول حصه واخر حصه اما الحصص الباقي شردنا منها ، ولا احد صادنا ولا شي
انزين يوم ثاني قمنا حضرنا من الاولى الى الرابعه وشردنا من الخامسه والسادسه


بس شوفوا الحظ ... واحنا قاعدين وسوالف ومستنانسين الحصه السادسه ... الا نسمع اسامينا في الميكرفون ... صادووووووووووووووووووووووووووووونا


عاد مته اخر حصه



والله حسافه


ادري شطانه بس وش نسوي حصص ممله

[أبو سراج]

نواصل ذكرياتنا المدرسية


مرة كان الجو ممطر وبرد عدل
وانا كنت مريض ومسكينة الوالده لحفتني بديش اللفافه وقالت لي روح يا وليدي الله وياك

عاد رحت وإلا باص حجي حبيب مشى عني وهذي أول مره يهرب عني

والمدرسة في كرزكان

جان امشي في هالبرد وأنا مريض
وتصدقون وصلت المدرسة مشي وإلا الحصة الأولى خلصت

دخلت من البوابة وما عليها أحد

قلت إن شاء الله محد يشوفني وبروح الصف ولا كأنه شيء حصل لأنه الغياب يآخذونه الحصة الثانية

وبس توني بلف عن الإدارة إلا الفراش اللي فتن علّي قال للمدير أكو واحد توّه جاي
جان يلحقني المدير ويقول لي تعال يا ولد

انا وقايلين لي يا ولد
إرتجفت ووقفت مكاني

رحت ليه جان يرفع ذيج الكف ويطرقني بيه ( وانا مريض وما حسيت إلا الدنيا تلف ) ( وهذا أول طراق احصله في حياتي )

بس أوتعيت منه قال لي روح لأستاذ غلام ( هذا المشرف ) جان اروج ليه ويقول لي
ليش متاخر
ما يجي لكم باصين من الصبح ( هذه عبارته المعتاده )

بس أخذ علي تعهد وهذه اول مره اتاخر فيها ولاه مريض بعد

لكن اللي باط جبدي هالفراش اللي علّم علي

ليومك انا مآخذ عليه

بس ما حاقد عليه

على العموم كان موقف وذكرى احببت اذكرها


تحياتي

[زيزو]

مواقف كثيره حصلت ايام المدرسه
* مره كنت في صف الاول الابتدائي وكان عندنا تطعيم (ابر) وكنت اخاف من الابر عدل ... المهم صفونا سيده وكان عندهم كشف الاسماء , كلما قرب يوصل دوري اقدم اللي ورايي واشوف اللي يضربونه يرجع ايصيح اوهوه طايف يوم شفت المدرش مشغول اشوي بطلت ذراعي وقعدت اصيح وانا رايح الصف (( يازعم ضربوني)) وفكرت اني فعلا قصيت عليهم خصوصا انهم مشوا ....
المهم جاء المشرف يوم ثاني وقال اسمي بس وقال لي تعال بنوديك الحديقه عقبها ركبوني باص وكل مامرينا صوب حديقه قلت اكيد هذي وتطلع لا , لحد ماوصلنا الى مركز النعيم ((على ما اعتقد)) ضربوني عقبها الابره غصبا عني ورجعت دايخ

وفيه مواقف راح اقولها بعدين

[نبوية]

هههههههه
على طاري الابر

الخدعة سويتها في اول اعدادي لعملمك ليومناهذا اخاف من الابر بعد الجنس الناعم

المهم ودونا الصالة عاد احنا متخرعين عندنا صالة في المدرسة مو فاطمة بنت اسد اللا يقولون بنضربكم ابر ديك الحزة زخيت عرق والدمعة سالت ويش اسوي الحين وكانت مدرسة الرياضة اتطالع فيني مستغربة اصيح خيفانه من الابر عموما جتني فكرة قمت جفست ايدي وطلعت مستانسة
مدرسة الرياضة جت ليي قالت ليي اتعور الابر الحين لو لا
قلت لا حليوة الابر ما اتعور باردة وطلع دم اشوية

قالت لي بشوف الدم اوه اتوهقت الحين ويش اسوي
راويتها ايدي اللا ما فيها قطنة ولا ابر ولا خرابيط جودتني في ايدي واودتني للممرضة ولا عند السودة وضربتني بالفول عورني عدل

الله لا يراويكم


صحت اصياح


نبوية